►A oferta formativa desenvólvese ata o 21 de maio combinando sesións presenciais e sesións online
►Programación, distribución ou produción técnica, pero tamén historia, crítica, premios e educación, entre as áreas temáticas do curso para o que se preinscribiron 115 persoas
Na mañá do martes 9 de abril comezou na Cidade da Cultura de Santiago de Compostela o curso “Deseño de Programacións de Artes Escénicas”, promovido pola Xunta de Galicia a través da Axencia Galega das Industrias Culturais en colaboración coa AGPXC. Esta oferta formativa distribúese en sete sesións nas que vinte e tres docentes de referencia neste ámbito en Galicia desenvolverán unha ampla proposta de contidos. Un curso que, tal como sinalou o director da Agadic, Jacobo Sutil, nace da demanda do propio sector. Dotar o colectivo de programadoras/es de recursos para o deseño de programacións de Artes Escénicas, incentivar novos modelos que dean cabida á riqueza e diversidade actual de propostas, propiciar unha relación enriquecedora entre todos os axentes deste ámbito e fomentar a conexión entre Artes Escénicas e públicos, son os obxectivos do curso. Sesenta profesionais, maioritariamente axentes e compañias de artes escénicas e técnicos de cultura, están matriculados; a demanda duplicou o número de prazas dispoñibles.
“Este curso é o resultado do diálogo permanente co sector, en continuidade co que emprendimos o ano pasado ao redor da danza e que seguimos agora con esta formación específica en programación das artes escénicas. O que pretendemos é ampliar os coñecementos, cun programa moi completo, demandado polo sector. A demanda case duplicou a oferta, asi que hai que felicitar a AGPXC por detectar esa necesidade”, sinalou Jacobo Sutil. O director da Axencia Galega de Industrias Culturais explicou no acto de apertura que o curso é resultado do diálogo permanente, co que ademais de dotar de ferramentas e recursos ás persoas matriculadas, o curso Deseño de Programacións de Artes Escénicas quere ser un espazo no que abordar novos modelos de produción e exhibición de espectáculos así como fomentar a conexión co público.
Na presentación do curso, que ten unha duración total de 42 horas, Jacobo Sutil estivo acompañado de Carlos Lorenzo, presidente da AGPXC e director do curso, que agradeceu á Agadic e a Jacobo Sutil a súa implicación e apoio na formación de profesionais. “Hai tempo que detectamos que os programadores precisaban de máis recursos, de ter criterios para o seu traballo. Necesidade de obter un impacto sociocultural; non exhibir por exhibir, senón que a sociedade perciba como a cultura mellora a calidade de vida”, sinalou. “O curso divídese en sesións online, coas que incidimos no aforro de desprazamentos e transporte, e sesións presenciais que fomentan o contacto e o coñecemento mutuo”, engadiu.
Lorenzo destacou o perfil referencial do cadro docente desta acción formativa, “cómplice deste curso”. O autor e ex director do Centro Dramático Galego, Manuel Guede, o dramaturgo e presidente de Escena Galega, Santiago Cortegoso, a coreógrafa Paula Quintas, o crítico Afonso Becerra, e o xestor cultural e xerente de Escena Galega, Diego Vázquez Meizoso, participaron na primeira xornada. Ademais, Marta Alonso, Carmen Castro, Nacho Fungueiriño, Gonçalo Guerreiro, Patricia Hermida, Inma López Silva, Carlos Lorenzo, Kirenia Martínez. Fefa Noia, Fran Núñez, Belén Pichel, Pilar Portela, Fran Rei, Paulo Rodríguez, Miguel Soto, María Torres, Artur Trillo e Manuel Vieites completan a relación de docentes do curso, que remata o 21 de maio.
Os contidos do curso “Deseño de programacións de Artes Escénicas! abranguen un amplo abano de temas e recursos útiles paras as persoas matriculadas: desde estratexias de programación, modelos de produción e financiamento, aspectos normativos ou achegamento aos materiais técnicos nos espectáculos; tamén a historia das artes escénicas en Galicia, o seu impacto sociocultural, o papel dos premios e da crítica, ou as particularidades do teatro infantil.